Angallatinut pisoqalisimasunut isateristitsinissamut qinnuteqaatit

Angallatit pisoqalisimasut sinerissap qanittuani aalisariutitut atorsimasut isaterneqarnissaanut tapiisoqarsinnaavoq. Makkulu pingaarnertut piumasaqaataapput:

• Umiarsuarnik nalunaarsuiffiup aalisariutit pillugit nalunaarsuutaani imaluunniit angallatinik nalunaarsuiffimmi nalunaarsorsimassaaq
• Angallatip allagartaa malillugu 5BRT/8BT qaangersimappagu taamaattorli 75BRT/120 BT ataallugu angissuseqarpat.
• Ukiunik 25-nik pisoqaassuseqarpat, pisoqaaneruppalluunniit
• Nunatsinni aalisaqataasipat, aamma
• piffissaq qinnuteqarfiusoq sioqqullugu ukiumi qaammatisiuteqarfiusumi ukiuni marlunni pisassiissutinik nammineq pigisanit nuussinikuusimanngippat. Tamatumani aamma pineqarput pisassiissutinit pigisat tamakkerlugit taassumaluunniit ilaannaanit nuussisoqarsimappat.

Qaqugukkut qinnuteqatoqarsinnaava?

Sequtserinissamut qinnuteqaatit allaffissornikkut inaarutaasumik suliarineqarnerini Naalakkersuisut Sequtserinissamut ataatsimiititaliamik pilersitsinikuupput. Taakkulu ulluinnarni ingerlatsinermut malittarisassaat malillugit, ukiup aallartinnerani qaammatini pingasuni siullerni qinnuteqatit katersorneqassapput, allaffissornikkullu suliarineqassallutik. Ukiullu qaammataasa sisamaanni kikkut tapiiffigineqassanersut ataatsimiinnermi eqqartorneqarlutik inaarutaasumik aalajagiivineqassallutik.

qinnuteqarfissaq uvani aajuk

Qanoq annertutigisumik tapiisoqarsinnaava?

Naatsorsueriaatsit marluk atorneqartarput, tassalu

• Namminersorlutik Oqartussat, angallatit pisoqanngulersut isaterneqarnissaanut tapiissutit pillugit kaajallaasitaat 1. September 2010-meersoq, uvani takuuk:
• Angallammik naliliisartup akuerisap naliliinera malillugu naatsorsuineq. Angallammik naliliisartut allattorsimaffiat uvani takuuk

Qulaani naliliinerit marluk inernerini mikineq tapiissutitut tunniunneqarsinnaavoq.

Tapiissutissatut aningaasaliissutit killeqarneri pissutigalugu tulleriiaarineq pisariaqartillugu tulleriiaarinermi makku malinneqassapput:

1. Angallatip pisoqaassusia usitussusialu.
2. Siusinnersukkut pisassiisutinit aalisarnermit pisaqarsimanerit
3. Angallatit amerlassusaat imaluunniit sumiiffinni aalisarsinnaanermut akuerissutit, imaluunniit
4. Aalisarnermi naammassisat aalisakkat suussusaanut agguataarlugit.

Qaqugukkut qinnuteqartoqarsinnaava?

Ukioq kaajallallugu qinnuteqartoqarsinnaavoq.

Tapiissutit qaqukkut tunniunneqassappat?

Angallat nugulluni isaterneqareerpat.

Angallat angallatit allattorsimaffianni peerneqareerpat.

Inatsisit toqqamaaviit.

Aalisarnermut aningaasaliissutinut immikkoortitat pillugit Inatsisartut inatsisaat nr. 15, 20. November 2006 

Aalisarnermut aningaasaliissutinut immikkoortitat pillugit Inatsisartut inatsisaata allanngortinneqarnera pillugu Inatsisartut inatsisaat nr. 13. 2. November 2009. (Angallatinik pisoqqanik sequtserinissamut tapiisarnermik atuutilersitsineq aamma angallatinik nutarterinermi tapiissutinik qaffaaneq) 

Aalisarnermut aningaasaliissutinut immikkoortitat pillugit Inatsisartut inatsisaata allanngortinneqarnera pillugu Inatsisartut inatsisaat nr. 26, 9. December 2015-meersoq (Isaterinermi aalisarsinnaanermut akuersissutinik pisassiissutinillu piginniinnartarneq kiisalu isaterinermut il.il. tapiissutinik uuttortaasarnermi aalisariutip piviusumik nalinganik atuineq)